|
آق اولدوزوم
آق اولدوزوم! سن هارای و من هارا سن شانلی بیر پارلاق اولدوز من قارا قار یاغیش آغلیر هاوامیز گل آچاق پنجره نی سن یاغیشا من قــارا *** گل بیر چاتاق قارچئچگین دادینه سالاق اونـو بولودلارین یادینه گل بو درین درین اوره ک چاتلارین بیز ایلیگ گولدانلارین آدینه ***
آق اولدوزوم گل! بیر باخاق داغلارا قاردا بوغولـموش بولاغا باغلارا گل! بو قیشین آق بـوزونا باخمیاق آچاق قارا پنجره نی آقلارا ***
... من یاندیم قونشو باخدی
یاغیش آلتیندا بیر گون دایاندیم قونشو باخدی آلاو دوشدو جانیما من یاندیم قونشو باخدی
یول گوزله دیم بولودلار چئکلسین آی گورکسون بولودلانیب هر آخشام، تالاندیم قونشو باخدی
اوره ک بوتون جارلاشدی مصرین یولون سپورسین کنعان کیمین غم اوسته قالاندیم قونشو باخدی
یاغیش یاغیب یاغار کن ایسلاندی ائنتظاریم قنوت الده اوت ایچره یوباندیم قونشو باخدی
یارگئتدی من دایاقـسیز دولوب بوشالدیم هرگون گودن یئره بولود کیم جالاندیم قونشو باخدی
چئتیرسیز عاشیق اولماق، چتیندور چوخ ولی من یاغیش آلتیندا قانه بویاندیم قونشو باخدی
ققنوس کیمین گوزونده آلاو لاندیم کول اولدوم یئنگیشدن اوز کولومدن یاراندیم قونشو باخدی
دامــــلا، دامــــلا
داملا داملا سپه لنمیش گورورم گوزلریمی آددیم آددیملا چئلنمیش گورورم گوزلریمی
او زماندان کی شافاقلار آوار اولدو باشیما قانیله عشقه بئلنمیش گورورم گوزلریمی
بیر قورو یاپراقا بنزر کی آغاجدان یره دوشسون یار الینده یئله لنمیش گورورم گوزلریمی
بیردیلنچی کیمی سالدی منی هرقاپویا پنجره یه هرگولو هر یئرده دلنمیش گورورم گوزلریمی
اوقدر اوینادیب الده منی بو اسکی فلک ترسه ترسه گئجه لنمیش گورورم گوزلریمی
آسیلیب قلبیری کیپریکلریمه قاشلاریما اونونو چوخدان النمیش گورورم گوزلریمی
جالانان سو کیمی اولماز یغیشام من یئنی دن داملا داملا سپه لنمیش گورورم گوزلریمی
وار اومیدیم گله آدینه گونی ائل گمی سی سئل ایچینده لپه لنمیش گورورم گوزلریمی
یارالــــی گون
نیزه دن باش قاریشیب؛ ایستیر ازون چکسی دارا دامچی دامچیم قان آخیب بیر بیر ازون چکسی دارا
دوشوب الدن اله گون؛ کوینگینی قورد پارالیر دل دوداق سوره نور؛ تکبیر ازون چکسی دارا
گوردو آی قولسوز اولوب مشکینی ظلمت جالییب قانلی پرچم یارالی شمشیر ازون چکسـی دارا
تولکولر جولان ائدیب اصلانا فرمان ویرری یری واردیر سود امر شیر ازون چکسی دارا
قول قالیب علقمده؛ ترپدیری یئل بئشیکی گرگ اوچ شعبه لی تقدیر ازون چکسی دارا
سوسوز اولدوزلار آخیب؛ قانلی آی دوره لییب کیم دیور آغلیا داش زنـجیر ازون چکسی دارا
اولدو آخشام، یارالی گون گووه باخمور؛ یئرده آز قالیبدورکی بولود،گوو، یئر ازون چکسی دارا
حوزنیله دوشدو یولا سس سیز دایاقـسیز کاروان کربلا بغض ایلییب، ایستیر ازون چکسی دارا
... سس سیز
آددیم،آددیم غزل ایچره ساچیلان قوللاری سس سیز آچیلیب لاله یه بنزر آچیلان قوللاری سس سیز
آی گون دوتولان وقته ناماز قیلما گرکدیر آی،گون اتگیندن آسیلان قوللاری سس سیز
سنه آتدان یئره دوشمک دا یاراشماز اودا قولسوز آی شئعریده قولسوز یازیلان قوللاری،سس سیز
ایندی بایراق الیمیزده ترپئدیر یئل قولووی یاپیشیب بایراقا دیبدن یاریلان قوللاری،سس سیز
گنه نخلیستانا بنزیر اوره گیم اوخشویور علقمه یه اوره گیم ایچره اوره کدن سایلان قوللاری سس سیز
گور نجه ائتدی وفا آی گونه ظولمت گجه لرده اوقارانلیقلار الینده آتیلان قوللاری سس سیز
سنی قولسوز گئتریب شئعره چکممز شاعر آددیم،آددیم غزل ایچره ساچیلان قوللاری سس سیز
+ نوشته شده در شنبه نهم مهر ۱۳۹۰ساعت 10:34 توسط khalil mokhtarinia
|
|
|
